Business

Pengelandik Jari Patut Disokong.

3 July 2021: Pemanah kek tangu Iban, kantung berau enggau perecha kumang digaga Pemungkal Rockabakers Cake, Charlene Johnny mujur narit ati mensia mayuh ba laman Facebook.

Penerang mantaika gambar kek tangu nya udah dikunsi lebih 750 enggau lebih 580 likes ba laman Facebook Rockabakers Cake.

Lebuh dirandau, Charlene madahka iya berengkah ngaga kek tangu Iban, kantung berau enggau perecha kumang nya pengudah nerima peminta ari siku penguna ke ngasuh iya ngaga kek baka nya.

“Aku belabuh ngaga kek tu pengudah nerima peminta ari siku penguna benama Francie Majing ke dekaka kek baka nya.

“Francie ngasuh aku ngaga kek ke lain ari orang bukai beserimbai enggau hari pengada indai enggau inik iya apin lama ke udah.

Tekenyit ga ninga peminta iya laban enda kala ngaga kek baka nya tang aku naka ulih nangkup peminta nya.

RockaBaker Cakes.Kuching,Sarawak.

“Nguji ngapa ga tudah diri laban dekaka penguna tepantup ati lalu aku berengkah ngiga gambar enggau penerang sentang meda gamal tangu ke manah chura iya digaga nyadi kek,” ku iya.

Nambahka nya, Charlene ukai semina nerima timbal ke chukup manah ari penguna ke ngasuh iya ngaga kek nya tang kek tangu nya nyau narit ati mensia mayuh.

Ku Charlene, iya lantang ati laban ulih nangkup peminta bala penguna sereta ulih berundingka kek baru.
“Aku mai ati berani ngaga kek tu bepelasarka gambar enggau penerang tangu digiga aku laban nadai kala ku meda orang ngaga kek tangu Iban tu,” ku iya nerang.

Charlene mega madahka iya temegah ati laban mujur ngaga kek tu kelai gaga ati nyadi anak Iban sereta mantaika keresa lama Iban ke nyelai enggau manah dipeda.

Charlene madahka iya ngaga kek tangu Iban, kantung berau enggau perecha kumang tu pengelama lapan jam.

“Lebuh ngaga kek tu, aku naka ulih nguji ngaga likau ke bisi ba tangu nya laban nangika salah likau, salah chura iya.

“Kebuah pia laban enti udah salah diadu ari pun, sigi enda ulih diadu baru, ka pen enda ngaga baru meh kek nya ari pun,” ku Charlene nerang resia enggau pemar ngaga kek tu.

Dulu ari nya, keranjai jari Charlene mega kala narit ati mensia mayuh lebuh ngaga kek Ta’ah nitihka peminta siku penguna ke minat meda keresa etnik di Sarawak.

“Siku penguna aku lebuh nya ngasuh nguji ngaga ukir Orang Ulu tang iya enda madahka nama ukir dikeingin ati.

Tang lebuh iya madahka peminta nya, aku lalu teulihka runding deka ngaga ukir Ta’ah.

Ungkup penerang semua, Ta’ah tu sebansa pekayan asal indu Orang Ulu (etnik Kenyah enggau Kayan).

Ku Charlene, pekayan nya ditengkebang ari kain baldu diias labuchi enggau manik sereta diukir gamal remaung enggau paku.

Tebal agi, iya madahka baju tu dikena pengantin baru enggau mega lebuh mandangka tanda asal Orang Ulu.

“Aku keran deka ngaga kek Ta’ah tu laban rindu deka mandangka pemanah pekayan asal bansa aku empu, bansa Kenyah.

“Tu mega sebagi ari chara aku ngangkatka keresa lama raban bansa diri empu lalu likau kek Ta’ah nya dichampur enggau likau tikai bemban enggau ketapu burung Orang Ulu.

“Lebuh Pengerami Gawai Dayak tu tadi, bisi dua iku udah ngudar kek Ta’ah tu.

“Entara pemar ngaga kek Ta’ah tu iya nya lebuh nero likau sebaka enggau gambar likau ba pekayan Ta’ah nya tadi.

Tambah mega, aku mesti belubah ngias kek nya laban kek tu ukai segala tang besegi baka baju Ta’ah,” ku Charlene nerang.

Kelimpah ari nya, iya madahka diri ngaga kek Ta’ah tu pengelama lima ngagai enam jam laban mayuh pengawa ari pun dataika udah tembu.

Terubah nya, iya deka nunu kek nya pengelama 40 ngagai 45 minit lalu nganti sejam dataika kek nya udah chelap.

Udah nya, iya deka ngaduka layer kek sereta engkah lapis keterubah pengelama 20 sebedau ditepu dalam peti ais pengelama 15 mimit.

Tembu nya tadi, iya deka ngaga lapis kedua pengelama sepuluh mimit lalu tepu dalam peti ais pengelama 30 minit.

Udah ku Charlene, baru iya belabuh ngaga chura baka gamal pekayan Ta’ah pengelama 30 mimit sereta nero likau pengelama sejam setengah ngagai dua jam.

SuaraSarawak/2 July 2021

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s